Ceramah Agama berbahasa bugis - Pappedalle'na puang Allahu ta'ala
 |
| Ceramah berbahasa bugis - Pappedalle'na puang Allahu ta'ala |
Sukkuru’ tenrigangka lao risese arajanna puang Allahu ta’ala rimuka engkatamuannessi nawereng apanginringeng, nawereng appatiroang,natopada engkasi hadere rilalenna iyewehe onrong mabbarakka e.
Salawa’ nenniya pappassalama’ lao ri pangulukkeng nabitta Muhammad Saw. Nabi iya mancaji e rahmatan lilaalamin mancaji pammase ri alangnge.
Narekko tomabbicara masalah assappareng dalle’ iyanaritu sitongeng-tongengnnai iwajikengngi lao risinninnai rupa tau e. Nasaba sininnai anu purae napancaji puang Allahu ta’ala de’ na patuoi sengadinnai pura mettoni ipatentungengngi dalle’na ri puang Allahu ta’ala terutamani idi rupa tau e. Jaji melo mani bawang isappa delle hallala’na iya purae itarongengki nasibawai laleng patujue lao ri laleng anu napurioe puang Allahu ta’ala nasaba akkaresongeng tongeng-tongeng nenniya parellau doangeng. Pada toha narempewe puang Allahu ta’ala rilalenna akorang malebbi eri surah Al-A’raaf ayat :10
Makkebettuangengngi makkadae :
“ Nenniya ripancajingengko ri lebo’na tana e mancajiwi onroang akkatuo-tuongeng naiakiya makurang ladde’ asukkurukengmu”(QS. Al-A’raaf : 10)
Sininna to matoa malebbikkeng anrengnge silessureng malebbikkeng engkae pada riyammasei ri puang Allahu ta’ala.
Iyewe linoe onroang sappa i pappedalle’ hallala’na puang Allahu ta’ala na engka riwereng delle’ masagena, engkato riwereng delle’ tengnga-tengnga na mi, engkato makurang mi dallena riwerengngi. Iyemaneng naro tanrang pappojinna puang Allahu ta’ala lao ri atanna namaelo mujiwi, melo mitai gangka kegai batena musahai, sappa i pappedalle iya engkanae pura ripassadiangengngi ri puang Allahu ta’ala. Naekiya tennia pole ri maeganai yaregga makurangngi dalle’ ta mancaji ukuran naekiya pole ri asukkurengta mi tarimai pappedalle engkae nawerengki puang Allahu ta’ala. Namuni ceddemi narekko mabbarakka’i nasaba laleng madeceng sappa i, naekiya lebbi makessingpiha narekko megai na mabbarakka nasaba laleng madeceng ipake sappa i dalle hallala’na puang Allahu ta’ala.
Umma’ selleng malebbi iya engkkae pada riammasei ri puang Allahu ta’ala
Assapparengnai dalle e parellui ripahang sibawa madeceng laleng-laleng apolengenna iya sicoco’e sibwai aturanna agama asellengeng e iyanaritu :
1. Ripadecengiwi carata makkasiwiang lao ripuang Allahu ta’ala. Nasaba narekko makessingngi bateta makkasiwiang insya Allah nabukkarengki laleng puang Allahu ta’ala nenniya nawerengngi barakka pole rilangi’e nenniya pole ritana e. Padatoha narampewe puang Allahu ta’ala rilalengnna akorang malebbi e surah Al-A’raaf ayat : 96
Bettuanna:
“ Bennegngi sininna rupa tau e rilino pada mateppe’ i nenniya pada mitau i ri puang Allahu ta’ala, majeppuna ribukkarengngi masse barakka ri puang Allahu ta’ala pole ri langi e neniya ri tana e.
Jaji nigi-nigi maelo lolongengi goncinna pappedalle’e pole ri puang Allahu ta’ala iyanaritu musti napakessingi jolo teppe’na nenniya tau na lao ri puang Allahu ta’ala. Makkotoparo paimeng nigi-nigi maelo rilomoiyyang pappedalle’na tapadecengiwi laloi pakkasiwiangta terutamani sempajangta, nasaba’ degaga tau ripakkasi-asi ripuang Allahu ta’ala tau makessing e pakkasiwiang sempajanna. Nasaba’ ri lalenna i sempajang e engka memeng toha paddoangeng nataro puang Allahu ta’ala sarekkoammeng i nabacai atanna riwettu massempajanna nawedding rilomoyyang i pappedalle’ hallalana koritu.
رب اغفرلي وارحمني وارفعني ورزقني وهدني وعافني واعفعني
Bettuanna :
“ E...Puang ...taddampengika nenniya tammaseika tokka, nenniya teppang i akurangeng ri watkkaleku, patarakkaka nenniya pappedallekika nasaba’ pappedale hallala ta.”
Pada toha rimakkadanai puang Allahu ta’ala rilalenna akorang malebbie surah Al-Jumu’ah ayat 10
Bettuanna :
“Narekko purani pada mu pasilennereng sempajang e pada teberre-berreno rilebo’na tana e nenniya sappani pappedalle hallalana puang Allahu ta’ala. majeppu aringerrangko maega lao ri puang Allahu ta’ala sarekkoammeng i engkako pada maupe.(QS. Al-Jumu’ah : 10)
Iyaro dalle’e riyakkaresongengpa isappa nainampa ilolongeng, iyanaro saba’na naengka adanna tau riyolota makkada e “ RESOPA TEMMANGINGI NAMALOMO NELETEI PAMMASE DEWATA”riwerengngi akkalebarakeng makkada e sedangkang ga iyero anre-anre iya mannessa-nessani engka riyolota, narekko de’ nato makkareso mampai wi nainnampa ipatama rilalenna timu e narikecca nainammpa riemme’i de’ naullei kajajiang manre alalena timutta padahal mannessani engkani iyye riyolota he. Jaji iye lino e napancajingengki puang Allahu ta’ala sarekkoammeng i yonroi makkareso. Pada toha narampe puang Allahu ta’ala rilalenna akorang malebbi esurah An-Naba’ayat 11.
Bettuanna :
“ Nenniya ipancajiwi essoe sarekkoammengngi yonroi makkareso sappa i akkatuongeng madeceng “
2. Pappedalle iya engkae pura ilolongeng riabberengngi sesa’ nasaba pole okko i puang Allahu ta’ala nasaba’engka appunnangenna tau mamalaa e ri warammparang purae yakkaresoang. Pada toha rimakkadanai puang Allahu ta’ala rilalenna akorang malebbi e surah At-Taubah ayat 103
Bettuanna :
“ Alai pole ri waramparammu tu mennang mancaji sekke iya engkaewe sarekkoammeng i mancaji pappepaccing i pole ri waramparammu.”
Narimakkuannanaro parellui ipassu i sekke waramparatta idi rupa tau e narekko narapi sipassekkereng, nasaba uppanna-uppanna denaipassu i sekke waramparang aga engka riappunnai e nagangkanna narapini sipassekkereng majeppuna nacaccaki puang Allahu ta’ala sibawa surona nasaba yanrewi appunnangenna tau e. Iyero agagae we pole ko mi idi nassabari naengka wedding tona riyabbereang barakkummeng i engka i sipa’assiammase-masengenge riyappunnai kuritu namalomo tona ilolongeng dalle tassanna-sanna e.
3. Makessingpi assisumpungeng lolo e
iyatona mabiasa idi rupa tau e riangga biasa idi assisumpungeng loloe maderini sicacca padanna massilessureng padanna bali bolana bahkan padanna keluargana iyaregga tomatoanna naewai massasa nassabari namasolang na assisumpungeng lolo e. iyanaro nassabari nakkadanai puang Allahu ta’ala rilalenna akorang malebbi e surah Ar-Rad ayat 21
Bettuanna :
“ Naiyya tau mappasisumpung e aga pura napparentaiyyang puang Allahu ta’ala sarekkoammeng ripasisumpung i nenniya pada metau i ri puang Allahu ta’ala sibawa paccallanna iya temakae peddi’ na kaminang maja e”
4. Ipamegaiwi zikkiri’e nenniya parellau doangeng e lao ri puang Allahu ta’ala. Nasaba namuni maga bateta makkareso narekko dinatomellau doang lolongeng barakkana karesota lao ri puang Allahu ta’ala detto nariulle lolongeng i riaseng e sau kininnawa nasaba degaga asukkurukeng riayappunnai. Pada toha narampewe puang Allahu ta’ala ri laleng akorang malebbi e surah Al-Baqarah ayat 152.
Bettuanna :
“ Narimakkuannanaro ingngerangka wingngerang tokko (Adanna Puang Allahu Ta’ala) nenniya sukkurukika na aja muassakkareng i pappedalle iyaregga pappenyameng engkae uwerekko.”
Aringngerangenge ri puang Allahu ta’ala mancajiwi anu waji’ eri yappunnai idi rupa tau e tegi-tegiki monro, umpamana ri bola e, rikantoro’ e, risikola e, ri galung e, ri pasa e, nenniya rilainna topa paimeng. Sarekkoammeng i napabbarakka i wassele karesota puang Allahu ta’ala nasaba de’ gaga ceko-ceko, aggau bawang narekko simata toli maringngerang ki ri puang Allahu ta’ala.
Umma’selleng malebbi engkae riyammasei ripuang Allahu ta’ala
Narekko maeloki nalomoiyyang pappedalletta puang Allahu ta’ala tapamegai laloi parellau doamgengta lao rialena nasaba makkada toi puang Allahu ta’ala rilalengna akorang malebbi e surah Al-Mu’min ayat 60.
Bettuanna :
“ Makkadai Puang Allahu ta’ala : “ Arellau doakko lao ri iya, majeppunna utarima paddoangengmu. Sitongeng-tongengna tau mabangka’ e pole ri assompangeng lao ri aleku tama’ i ri lalengna naraka jahannam nasibawai atunangeng kaminang matuna e.”
Jaji agi-agi riyapparelluang degaga wedding ri onroi marellau sengadinna puang Allahu ta’ala, nasaba uppanna-uppanna kajajiang i iyero ri tengngata idi rupa tau e majeppu termasu’ni tu pegau seddie dosa maraja kaminang nacaccae puang Allahu ta’ala iyanaritu appadduangeng e nadosa iya de’ e nariyaddampengeng i dosa-dosana iyanaritu tau mappaddua e.
iya mancaji e passiona i iyaregga paccappureng warekkada pole risiagae egana warekkada riyase’ iyanaritu iperhatikangngi, ipegaukenna i aga iya mancaji laleng-laleng naweddingngi namalomo nabarrakkaki pappedalle’ hallala’na puang Allahu ta’ala lao ri siagae egana akkaresota sarekkoammeng ngi napitakki laleng nawedding iruntu riona puang Allahu ta’ala nenniya napoji tokki koritu.
sininna tomatoa malebbikkeng anreng e silessureng malebbikkeng engka epura ri yammasei ri puang Allahu ta’ala
Nulle sikomiro urapi rampe-rampengengki ada-ada assiparingerrangeng mamuare mabbarakka i lao ri idi maneng terutamani lao rialeku
وبا لله التوفيق والسعدة
والسلم عليكم ورحمة الله وبركاته
Terima Kasih Anda sudah membaca http://ogibicara.blogspot.co.id Ceramah agama berbahasa bugis - Pappedalle'na puang Allahu ta'ala
