 |
Da'awah islamiyah berbahasa Bugis - Rupa-rupannai Tau' e Ri laleng Akorang malebbi' e
الحمد لله رب العا لمين وبه نستعن على امور ادنيا ودين واصلا ة والسلام على اشرف الا انبياء وامرسلين سيدنا ومولن محمد وعلى اله واصحا به اجمعين اما بعد حسبنا لله ونعم الوكيل نعم امول ونعم النسير ولا حول ولا قوت الا با لله العلي العظيم
Umma selleng malebbi engkae pura riyammasei ri puang Allahu ta’ala
Sukkuru’ ki mappoji lao ri sese arajanna puang Allahu ta’ala, nasaba’ pammasena lao idi maneng natopada engkasi hadere ri lalenna iye onrong mabbarakka’ e sikira-kira pasilennerengngi pakkasiwiang iya pura e napparentayyang puang Allahu ta’ala.
Tenriallupai topa kiringeng i salawa’ nenniya pappassalama’ lao ri ale malebbinna nabikkeng Muhammad Saw nasaba tanrang pappojitta lao rialena kuritu. Namamuare nakarena assalawaketta denre nassabari to lolongeng i safaat na nabita nasaba dena gaga asalamakeng ri esso addepung-deppungenna tau e ripadang masy’ar sengadinna i asalamakeng napapole seddi e rupa tau pole ri nabitta amin, amin, amin, yaa rabbal alamin.
Naiyya maelo e riala ada - ada assiparingerrangeng rilalenna iye wettu cinampe e namamuare napabbarakka’ e puang Allahu ta’ala iyanaritu “ Rupa-rupannai tau e ri laleng na akorang malebbi e”. Pada toha rimakkadanai puang Allahu ta’ala rilalenna akorang malebbi e surah Al-Fatir ayat 32.
Bettuanna :
“ Nainampa ipammanareng i kitta’ e ri tau pura e ipile pole ri atatta nenniya sasisa i kuritu engka nagau bawangmi alena, saisatoi engka tengnga-tengngana, saisatoi engka lebbi riolopi makkibbu amala madeceng nasaba pappalalona puang Allahu ta’ala. iyana kuero mancajiwi pallebbireng iya kaminang maraja e.”
sininna tomatoa malebbikkeng anreng e silessureng malebbikkeng engka epura ri yammasei ri puang Allahu ta’ala
Narimakkoannanaro ri lalenna iyewe aya’na puang Allahu ta’ala narampewi tellu rupa tau rilaleng akorang e iyanaritu:
1. Golonganna tau nagau bawang mi alena engkato tellu rupa-rupanna
a. Kafere’e
iyanaritu tau de’e namaelo mangakui akuasangenna puang Allahu ta’ala gangkanna de namaelo puadai kalima’ syahada’ pada toha narampewe puang Allahu ta’ala ri lalenna surah At-Taghaabun ayat 10
Bettuanna :
“ Naiyya tau kafere’e nenniya tau pabbelleang i aya’ aya’na puang Allahu ta’ala . iye maneng naro matu mancaji pangonroanna neraka enkai monro metta rilalenna kuritu nenniya iyanaro onrong kaminang maja ri siagae egana onrong arewekeng.”
b. Munafe’ e, iyanaritu nasengengi selleng alena ri lahereng E naiakiya silaingeng i aga ri lalenna atinna. Jaji tau bansana iye lebbi bahayapi na kafere’ e nasaba wedding i riaseng warikkaneng majeppu kebali wi lao ri idi. Jaji narimakkuannanaro ri ponro i matti ri onrong kaminang mariawana neraka, pada toha rimakkadanai puang Allahu ta’ala ri lalenna surah An-Nisaa’ ayat 145.
Bettuanna :
“ Sitongeng-tongenna tau munafe’e iponroi ri onrong kaminang mariawae ri neraka , naiyyadegaga seddi mua tau mulle lolongeng seddi rupa tau mancaji pappasalama lao ri alena koritu.”
c. Kelompo’na tau mappaddua e, iyanaritu tau pancajieng’e puang Allahu ta’ala kogsi, jaji iyaro tau mappaddua e wedding jaji nasompai puang Allahu ta’ala naekiya nasompa matoi rilainnae puang Allahu ta’ala nasaba engka mopa naseng makuasa rilainna kuritu, Narampe i puang Allahu ta’ala ri lalenna surah An-Nisaa Ayat : 48
Bettuanna :
“ Majeppu Puang Allahu ta’ala de’ naddampengiwi dosa appadduangeng enaiyya naddampengi rilainna rekkuero ri tau napueloe , na nigi-nigi mappaddua ri puang Allahu ta’ala majeppu papolei dosa kaminang maraja.”
sininna tomatoa malebbikkeng anreng e silessureng malebbikkeng engka epura ri yammasei ri puang Allahu ta’ala.
2. Golonganna tau mappalalo tengnga e iyanaritu tau mateppe’ e naikya madorakai lao ri puang Allahu ta’ala. wedding jaji massempajang matoi , mappuasa matoi, massumbang matoi,neikya napigau matoi aga nappesangkange puang Allahu ta’ala. Pada toha narampe puang Allahu ta’ala rilalenna akorang malebbi e surah At-Taubah ayat 102.
Bettuanna :
“ Nenniya engkato tau pada naakui dosa-dosana, engkai koritu napasikore-korei amala madeceng e nenniya amala maja e. Mamuarei puang Allahu ta’la natarimai koritu toba’na menangro, Nenniya puang Allahu ta’ala maraja addampeng nenniya maraja akkamase.”
sininna tomatoa malebbikkeng anreng e silessureng malebbikkeng engka epura ri yammasei ri puang Allahu ta’ala.
3. Golonganna tau paddioloi ri decengnge, jaji degaga leppe’ pole ripakkasiwiyana pada mui pakkasiwiang waji’na iyaregga pakkasiwiyang sunna’na, makkotoparo paemeng naniniriwi anu harang enenniya anu de e nannessa apolengenna makkotoparo saisannai anu hallala e nakya tennia appunnangetta.
jaji iya mancaji paccappureng ada pole ri siagae werekkada engkae riyase’ iyanaritu rilalenna i akorang e engka tellunrupa rupa-rupanna tau e iyanaritu Nagau bawammi alena , tau mappalalo tengnga e, tau magatti-gati e mappedeceng sarekkuammeng i lolongeng i pammasena i puang Allahu ta’ala.
sininna tomatoa malebbikkeng anreng e silessureng malebbikkeng engka epura ri yammasei ri puang Allahu ta’ala
Nulle sikomiro urapi rampe-rampengengki ada-ada assiparingerrangeng mamuare mabbarakka i lao ri idi maneng terutamani lao rialeku to mabbicara e.
وبا لله التوفيق والسعدة
والسلم عليكم ورحمة الله وبركاته
